2011年2月北海道道東道北12日 - Hello!! Pension Atreyu~

2月22日 - DAY 4 (PART 7)
砂湯 > 和琴半島 > Pension Atreyu

響砂湯睇完天鵝，我地就上返車，根據我地嘅schedule，所有之前同Pension女主人proposed嘅景點已經去晒，而家應該要去Pension Atreyu.....

車行左十多分鐘，去到一個湖邊，司機叔叔又好似平常咁同我地講左個地方名就示意我地落車遊覽 (之前抵達每個景點佢都會先用日文話我地知係咩地方).....咦，唔係應該去Pension咩，點解會走黎湖邊? 我記得之前望過下Pension嘅location好似唔係響正湖邊喎......

落左車行近湖邊，個湖好大，湖面結晒冰鋪滿白雪，好靚呀!!

有兩隻天鵝響湖邊曬緊日光浴~~

同樣都係鋪滿白雪嘅天鵝湖，呢度同砂湯個feel好唔同，砂湯聚集左好多天鵝好熱鬧，呢度相對就顯得好寧靜.....不過兩處都一樣咁靚!!

唔知係咪覺得我地騷擾左佢地嘅二人世界，兩隻天鵝一見有人就離開湖邊向湖中心走去......

兩隻天鵝步伐一致，結伴慢慢向外走，好sweet嘅感覺呀!!

其實我地唔知呢度係咩地方，亦唔知點解司機叔叔會車我地黎，不過如果以我地嘅多國語言同司機叔叔溝通睇怕都好難會問得出個究竟....我地估計係個taxi-sightseeing trip嘅時間仲未夠鐘 (之前schedule嘅時間係四個鐘，我地早左大半個鐘完成)，所以司機叔叔就順路同我地去多一個景點啦......姑勿論咩原因都好，可以去多一個景點，個view又咁靚當然又唔區囉!!

同場仲有隻烏鴉好悠閒咁響度抖涼~

北海道d雀鳥都好似唔怕人，不論天鵝烏鴉白鴿隻隻都企定響度任人影，好在佢地唔會飛去大中華地方，如果唔係肯定九死一生，連毛都無得剩.....

有指示另一邊係露天風呂.....

不過我地無行過去，因為都唔想響度hea太耐，費事太晏去Pension，我地仲有下一輪野玩~

Hea左一陣我地就上返車，司機叔叔原路兜返出去時，咁啱見到個指示牌，原來呢度係和琴半島呀.....我有d印象和琴半島都係出名嘅景點喎，嗰剎那有小小後悔，早知行埋過去露天溫泉嗰度望下啦，不過老爺話都上左車就算啦，反正之後我地都會去古丹溫泉，應該都係咁上下啫.....咁又係~

由和琴半島去Pension Atreyu好快，幾分鐘就到.....去到Pension，我地就按原先講好嘅價錢同司機叔叔找埋條數 (4000円一位)，司機叔叔好好人，之後仲幫我地將d行李搬入去Pension入面，真係唔該晒呀，我地對呢個taxi-sightseeing好滿意，最鍾意司機叔叔說話唔多但就照顧周到，thanks a lot ar!!

同司機叔叔bye-bye後，我地走入Pension，Pension女主人Ayumi Tomita已經企定定響玄關等我地.....女主人好nice，見到我地第一時間就問我地個sightseeing trip滿唔滿意，之後就同我地交帶一下住宿同戶外活動嘅安排.....無耐男主人亦都出埋黎同我地打招呼，感覺上女主人係比較好客嗰個，男主人無女主人咁多野講，淨係成日笑笑口有d怕羞咁，不過兩個人都真係好nice，而且英文都好ok，溝通完全無問題....閒扯左一陣女主人就帶我地去房間嘞~

呢座就係Pension主樓，樓下係食事處，二樓係客房.....

Pension主人就住響主樓後面嘅屋仔~

呢個就係我地住嘅另一棟木屋嘞......

聽女主人講，今晚成間木屋得我地兩個住客，另外有一pair外籍夫婦就住響主樓嗰邊~

我地間房，入左大門左手面第一間.....

間房叫合歡，幾好聽
 

room key

間房都幾大，客廳有兩張梳化......

簡單嘅擺設，但基本設施一應俱全，雪櫃、熱水壺、茶包、乾衣架等等都齊備~

另一邊係睡房......不過講真張床就麻麻好瞓......

另外仲有多一張床，呢間房可以住三四個人都得~

客廳同睡房中間有部小電視可以調教角度.....最鍾意係有兩個落地長窗可以望到外面嘅雪景~

Washroom都有兩個.....

雖然係民宿，但好乾淨好企理~

air con 亦有兩部~

響房間安頓好後，我地就出發去期待已久嘅古丹溫泉啦!!

(...待續)